Gallaðar erlendar fjárfestingar og lántökur.

SDG sagði nýlega að erlent fjármagn hefði sína galla og svipaði til erlendrar skuldsetningar. Þess vegna væri betra í mörgum tilvikum að fjárfestingin væri innlend. Þessi orð hafa valdið mörgum heilabrotum. Iðnaðarráðherra tók sig til og reyndi að útskýra hvað forsætisráðherra hefði verið að meina(!). Hún bætti því við að ekki væri gott að lífeyrissjóðir fjárfestu of mikið í áhætturekstri. Það væri leikur með lífeyri landsmanna. Nú hafa hagfræðingar gert umfangsmiklar rannsóknir á áhrifum erlendrar fjárfestingar. Komið hefur í ljós að erlend fjárfesting skilar meiri hagvexti en innlend. Fjárfestir tekur mun meiri áhættu en lánveitandi og gildir það jafnt um erlenda aðila og innlenda. Erlend fjárfesting er ekki bara peningar. Henni fylgir gjarnan víðtækt tengslanet inná erlenda markaði. Össur, Marel og CCP eru dæmi um íslensk fyrirtæki sem hafa vaxið vegna erlendrar fjárfestingar.

Stjórnarmyndun undir 42 augum.

Í Þýskalandi eru fyrstu viðræður að hefjast milli SPD, CDU og CSU. Kristilegir demókratar senda 14 fulltrúa á vettvang og jafnaðarmenn 7. Báðir aðilar hafa langan óska-og kröfulista og hvorugur vill gefa mikið eftir. Taktískar yfirlýsingar eru þegar hafnar. Fjöldi fulltrúa hefur vakið kátínu. Hvers vegna ekki að hafa viðræðurnar í þingsal Bundestages? Stjórnarmyndun þessara flokka árið 2005 krafðist ekki svo mikils fjölda. Fjórir stjórnmálaleiðtogar mynduðu þá stjórn, ákváðu stjórnarsáttmála og ráðherraskipan. Greinilega ríkir nú ekki jafn mikið traust milli flokkanna og þá. Nú munu jafnaðarmenn væntanlega hugsa sig um og bæta 7 fulltrúum við. Jafnræði verður að vera.

Kosningar í Austurríki. Andstæðingar ESB með 30% fylgi.

Í kosningum í Austurríki hélt stjórn jafnaðarmanna SPÖ og hægri flokksins ÖVP velli. Meirihlutinn stendur tæpt og flokkarnir töpuðu fylgi. Kanslari heitir Faymann og er jafnaðarmaður. Jafnaðarmenn fengu 27.% atkvæða en hægriflokkurinn 23.8%. FPÖ sem er hægri flokkur fékk 21.4% og bætti verulega við sig. Græningjar fengu 11.5%. Flokkur Franks Stromachs sem er áttræður milljarðamæringur fékk 5.8% og komst á þing. Flokkurinn er andstæðingur evrusamstarfs.  Neos fengu 4.8% og komust einnig á þing en í Austurríki er 4% atkvæða lágmark. Á þinginu eru 183 sæti og hafa stjórnarflokkarnir og hafa stjórnarflokkarnir 99 sæti samtals. Í öðrum löndum Evrópu hafa andstæðingar ESB og evrusamstarfs boðið fram . Í Þýskalandi fengu AfD 4.8% atkvæða. Í Hollandi fékk PVV 10% og Sannir Finnar fengu 19.1%. Í mörgum málum sem snerta Evrópusamstarf er aukinn meirihluti (2/3) nauðsynlegur. Í Austurríki er landlægt að kenna Brussel um það sem vanrækt hefur verið í eigin ranni. Það verður fróðlegt að fylgjast með framvindu mála í Austurríki.

Bankahruni ýtt úr vör.

Sigurður G Guðjónsson lögmaður skrifar grein í pressan.is og minnir á dagsetninguna 29.9 2008. Að morgni  þessa dags tilkynnti þáverandi formaður stjórnar Seðlabankans að ríkið myndi eignast 75% hlut í Glitni hf. Á þeirri stundu voru engin skrifleg gögn til um þessa afdrífaríku ákvörðun. Frjálshyggjan komst til valda á Íslandi á síðasta áratug 20. aldar. Þessi stefna hafði afgerandi áhrif á skipan efnahagsmála hér á landi. Mikið vald var fært frá hinu opinbera sviði til einkaaðila. Eðlilega gátu stjórnmálamenn ekki stýrt öllum einkaaaðilum. Sköpunarverkið snerist gegn skapara sínum. Einkavæðing í fámennu klíkusamfélagi getur aðeins orðið með einum hætti. Stjórnmálamennirnir hafa allir sloppið heilir úr þessum hildarleik. Allir nema Geir Haarde.

Siemens fækkar störfum um 15000.

Siemens er eitt af þekktustu fyrirtækjum heims. Það var stofnað 1847 í Berlín. Werner Siemens og Johan Halske stofnuðu fyrirtækið. Starfsmenn eru um 370 þúsund í 190 löndum. Í Þýskalandi mun störfum fækka um 5000 en talsmenn fyrirtækisins útiloka uppsagnir. Sparnaðaráætlunin heitir Siemens 2014 og hófst fyrir einu ári. Ætlunin er að spara sex milljarða evra. Helmingur starfanna 15 þúsund verður farinn haustið 2014 með því að stöðva nýráðningar í ákveðnum hlutum fyrirtækisins. Sparnaðaráætlunin verður framkvæmd í samráði við verkalýðsfélög og fyrirtækjaráð. Í þýskum fyrirtækjum hafa starfsmenn áhrif á ákvarðanir fyrirtækisins í fyrirtækjaráði.

Ed Milliband og breski Verkamannaflokkurinn.

Styrmir Gunnarsson virðist hafa áhyggjur af jafnaðarmannaflokkum í Evrópu auk þess að vera í pólitísku vanlíðunarkasti ef marka má skrifin á Evrópuvaktinni. Honum tekst þó að sinna daglegu skylduverki sínu sem að að hnýta í Samfylkinguna. Hvað um það. Ed Miliband var kosinn formaður Verkamannaflokksins fyrir þremur árum. Það hefur verið sagt að hann stundi "zen jafnaðarstefnu" sem felur í sér rólega yfirvegandi nálgun á stjórnmálin og tækifæri til að horfa til lengri tíma. Við erum ein þjóð sagði Miliband í ræðu fyrir þremur árum. Efnahagsleg og félagsleg samstaða er í fyrirrúmi en það er hún svo sannarlega ekki hjá Íhaldsflokki Cameron. Miliband hefur haft sitt í gegn í mörgum málum. Strangari löggjöf hefur verið sett um fjölmiðla. Hann gagnrrýndi stefnu Camerons gagnvart Sýrlandi harðlega. Hann vill breyta tengslum Verkamannaflokksins við verkalýðsfélögin og stórefla innra flokksstarf,m.a. með mikilli fjölgun flokksfélaga. Samkvæmt skoðanakönnunum er fylgi flokksins á bilinu 37% til 39% og flokksstarfið sjálft einkennist af eindrægni fremur en sundurlyndi. Miliband á ýmislegt eftir óunnið. Í skoðanakönnunum kemur hann lakar út en Cameron sem þó stendur sig langt í frá glæsilega.

Guðlaugur Þór skilur ekki hagræðingu.

Þingmaðurinn skrifar grein í pressuna.is og segir myndina sem blasi við einfalda og dökka. Ríkissjóður er rekinn ár eftir ár með tapi og það gengur ekki. Þetta er rétt svo langt sem það nær en leiðir til úrlausnar eru margar. Guðlaugur Þór virðist vera algerlega blindur á sumar þeirra. Hann minnist hvergi á að ríkið geti aflað sér aukinn tekna og skapað jöfnuð þannig. Annað augar sér ekki og hitt augað sér illa. Áætlun AGS um frumjöfnuð sem gerð var 2008 stóðst ekki. Það er rétt en hvernig væri ástandið í menntamálum, heilbrigðirmálum og fleiri málum ef henni hefði verið fylgt mjög hart eftir? GÞÞ veltir því ekkert fyrir sér heldur les uppúr hagfræðibókum að kostnaðurinn muni lenda á komandi kynslóðum. Auðvitað minnist GÞÞ ekkert á hrunið. það er eins og áætlun AGS hafi af ástæðulausu dottið af himnum ofan. GÞÞ minnist á skýrslu um fjölda ríkisstarfsmanna og hann fer villandi með tölur í þeim augljósa tilgangi að koma höggi á fyrrvernadi umhverfisráðherra. Ársverkum hjá ríkinu fjölgaði um 198 frá 2007. Nú bætir GÞÞ við ; en fækkaði um 18 þúsund á almennum markaði. Því miður er þetta ekki útfært nánar en að stilla þessu svona upp er fáránlegt. 2007 var ofhitnað bólusamfélag við það að springa. GÞÞ minnist ekkert á stofnanir Menntamálaráðuneytisins þar þar var mest fjölgun ársverka. Hann segir hins vegar að starfsmönnum á vegum Umhverfisráðuneytis hafi fjölgað um 130. Hér var nauðsynlegt fyrir GÞÞ að tala um starfshlutfall þessara starfsmanna eða ársverk en það gerir hann ekki. Engra skýringa er leitað enda er niðurstaðan fyrirframgefin ; það ríkir agaleysi í ríkisrekstrinum. Í lokin hafnar GÞÞ flötum sparnaði (væntanlega ekki í samráði við BB) en hann vill gera kerfisbreytingar. Hverjar þær eru vitum við ekki.

Hjól græðginnar snúast.....

Jóhanna Sigurðardóttir hefur ritað grein í The Reykjavik Grapevine og lítur yfir farinn veg. Sýn Jóhönnu á aðdraganda hrunsins og hrunið sjálft er vel þekkt. Hún minnir á ummæli Carsten Valgreen fyrrum aðalhagfræðings Danske Bank frá því janúar 2009. Valgreen sagði að það að skipa fyrrverandi forsætisráðherra sem bankastjóra Seðlabankans hefði haft skelfilegar afleiðingar. Bankanum hafi verið stjórnað á ótrúlega ófagmannlegan hátt. Eitt af fyrstu verkum vinstri stjórnar hafi verið að skipta um yfirstjórn bankans en tap bankans hafi kostað ríkissjóð 270 milljarða. (Jóhanna er ekki ein um að gagnrýna Seðlabankann. Tveir hagfræðingar af austuríska skólanum hafa ritað bók og vilja rekja hrunið til rangrar stefnu bankans.) Vinstri stjórnin tók við búi í rústum. Bankakerfið hrunið, stór hluti fyrirtækja gjaldþrota, gjaldeyrisvarasjóður Seðlabankans horfinn, verðbólga 19%, vextir 18% , verðtryggðar skuldir vaxið hratt og mikið atvinnuleysi. Lars Christiansen , danskur hagfræðingur, var einn fárra sem spáði efnahagslegri kollsteypu árið 2008. 2012 taldi hann að miðað við dýpt kreppunnar hefði Ísland komið vel frá henni. Jóhanna telur að stórkostleg kosningaloforð Framsóknar séu helsta ástæða mikils kosningaósigurs Samfylkingar.( Um þetta atriði má eðlilega deila.) Jóhanna nefnir fleiri atriði eins og umsóknaraðild að ESB, stjórnarskrármálið, og óleyst skuldavandamál hluta heimila. Um núverandi stjórn segir Jóhanna að hún hygli hinum eignamestu og tekjuhæstu. Enn á ný snúast hjól græðginnar.

Fjöldi ríkisstarfsmanna eftir Hrun.

Á árunum 2007 til 2011 minnkuðu fjárheimildir til allra ráðuneyta um 27 milljarða á verðlagi ársins 2011. Á sama tíma fjölgaði ársverkum  á vegum ríkisins um 198 á landinu öllu en mjög misjafnt eftir ráðuneytum og landsvæðum. Mestur hefur niðurskurður starfa verið á vegum Velferðarráðuneytis og Iðnaðarráðuneytis. Mest fjölgun hefur verið í stofnunum Menntamálaráðuneytis og Umhverfisráðuneytis. Ársverkum karla fjölgaði um 114 en kvenna um 84. Fjöldi ársverka fækkaði mest á Norðurlandi eystra og næst mest á Austurlandi. Höfuðborgarsbæðið hefur ekki orðið fyrir niðurskurði hvað varðar heildarfjölda ársverka. Ef stofnanir eru skoðaðar kemur í ljós að fækkun ársverka er mest hjá Landsspítalanum og Tryggingarstofnun. Þær 5 stofnanir þar sem hefur orðið mest fækkun eru allar á höfuðborgarsvæðinu. Tekjuhrap og skuldsetning ríkissjóðs höfðu og hafa fjölmargar afleiðingar. Niðurskurður bitnar á fleiri sviðum en starfsmannafjölda. Niðurskurður á einu sviði t.d. heilbrigðirmálum þýðir að kostnaður og vinna eru flutt yfir á heimilin. Þörf á umönnum og eftirliti hverfur ekki við niðurskurð hjá ríkisstofnun. ( Hagfræðistofnun Háskóla Íslands: skýrsla nr C01:13)

Franklin Graham talar við Guð.

Páfi kaþólskra hefur látið þá skoðun í ljós að kaþólskir væru alltof uppteknir af samkynhneigð, fóstureyðingum og getnaðarvörnum. Það má til sanns vegar færa.  Í Gamla og nýja testamentinu er aðeins minnst á samkynhneigð á örfáum stöðum. Jesús sjálfur minnist aldrei á samkynhneigð. Meðal annars þess vegna eru áherslur svokallaðra bókstafstrúarmanna og íhaldssamra guðfræðinga einkennilegar. Væntanlega eru þó allir kristnir menn sammála um að lesa eigi Gamla testamentið í ljósi orða og kenninga Jesú. Gamla testamenntið er rit sem verður til á löngu horfnu menningarsögulegu skeiði. Það sem þar er ritað er augljóslega háð stað og stund. Hvernig getur annað verið? Í þriðju bók Móses eru leiðbeiningar um það hvernig stunda skuli þrælakaup og þrælasölu. Ekki einu sinni bókstafstrúarmenn trúa þessu bókstaf eða taka leiðbeiningar alvarlega. Kannski hefur Guð sagt þeim að þessar greinar eigi ekki lengur við? Annað tengist þýðingum. Gamla testamentið er ritað á hebresku og þýðingar úr fornum textum eru ekki einfalt mál eða allra. Það er t.d. ljóst að félagslega fyrirbærið samkynhneigð í samtímanum á sér ekki algera samsömun við fyrirbærið á ritunartíma Gamla testamentis. Í Guðspjöllum Nýja Testamentisins er hvergi minnst beinum orðum á samkynhneigð. Það gerir hins vegar Páll postuli í nokkrum bréfum sínum. Framlag Páls í sögu kristninnar er ótrúlega mikið og hann á mikinn þátt í því að kristin trú breiðist út með undraverðum hætti. Í nokkrum bréfum Páls fordæmir hann ákveðnar kynlífsathafnir. Hvað hann er að fordæma nákvæmlega eru hins vegar guðfræðingar og grískufræðingar ósammála. Er hann að fordæma samræði karls og karls? Er hann að fordæma samræði karls og konu sem er eins og samræði karls og karls? Er hann að fordæma vændi ungra drengja? Fordæmir hann ekki samræði kvenna? Um þetta eru til mikil rit og fræðimönnunum virðist ekki hafa dottið í hug að gera það sem einfaldast er : að spyrja Guð.