73 þúsund erlendir ferðamenn......

Í síðasta mánuði fóru 73000 erlendir ferðamenn frá landinu um Flugstöð Leifs Eiríkssonar. Það er aukning um 13.2% milli ára. Á 12 ára tímabili hefur fjöldinn þrefaldast. Miklar sveiflur hafa verið á milli ára. Í september voru flestir ferðamannanna frá BNA, Bretlandi og Þýskalandi. þegar markaðssvæði er skoðuð kemur í ljós að aukning er frá öllum svæðum nema Norðurlöndum. Frá áramótum hafa 640000 erlendir ferðamenn farið frá landinu. Aukning milli ára er 19.2%. Frá áramótum hafa 274000 Íslendingar farið utan sem er 0.5% færri en í fyrra. Á heimasíðu Ferðamálastofu má sjá margvíslegar tölulegar upplýsingar. 

Eru Bjarni og Sigmundur Davíð í sömu ríkisstjórn?

Í byrjun september sagði forsætisráðherra í viðtali í Ríkissjónvarpinu að í nóvember gæti fólk séð hversu stór hluti verðtryggðra húsnæðislána yrði felldur niður. Þetta ætti að vera ljóst þegar sérfræðihópurinn hefur skilað niðurstöðum. (sjá kastljós 11.9.) Þegar forsætisráðherrann mælti þetta var hann nýkominn til landsins úr langri dvöl í Kanada. Um þessar mundir dvelur forsætisráðherrann í Flórída sér til hvíldar og hressingar. Fjármálaráðherra hefur sínar eigin skoðanir á skuldamálunum sem voru helsta mál síðustu kosninga. Hann telur afar ólíklegt að Alþingi geti afgreitt málið á þessu ári. Stefnan sé hins vegar óbreytt. Nú hafa þingmenn í hans flokki ýmislegt við stefnuna að athuga. Nú; orð og hugtök eru teygjanleg og loforð þroskast og breytast í þungum straumi tímans. Strax getur verið næsta kjörtímabil og þegar forsætisráðherra kemur til landsins hefur nóvember kannski breyst í hálft ár eða eitt ár?

Vændi í Þýskalandi.

1. janúar 2002 var sett ný heildarlöggjöf um vændi í Þýskalandi. Markmið laganna var að bæta lagalega stöðu vændiskvenna með því að gera starf þeirra löglegt. Þetta átti að mæta stöðu þeirra gagnvart tryggingum og réttindum sem launafólk og verktakar njóta. Fimm árum seinna lét ráðuneyti fjölskyldumála meta árangur sem orðið hefði af lögunum. Í stuttu máli má segja að árangur hafi verið nánast enginn. T.d. höfðu glæpir tengdir vændi lítið minnkað. Vændiskonur í Þýskalandi eru um 200000. Um ein milljón karlmanna kaupir sér þjónustu vændiskvenna á hverjum degi. 80% vændiskvenna í Þýskalandi eru erlendir ríkisborgarar. Flestar konur koma frá Austur-Evrópu. 2011 rannsakaði lögrelan 610 mansalsmál. Flest tengdust þau stúlkum frá Rúmeníu og Búlgaríu. Rúmur helmingur vændiskvenna sem beittar eru ofbeldi eru yngri en 21 árs. Meðalmánaðartekjur vændiskvenna voru 1500 evrur árið 2011. Árleg velta í vændisiðnaðinum er 14.5 milljarðar evra (2013). Í Þýskalandi eru uþb 3500 hóruhús. Eitt kvöld á vændishúsi kostar 100 evrur, götumella kostar 20 evrur og fylgdarkona eitt kvöld 1300 evrur. 

Starfsgreinasamband Íslands og ríkisstjórnin.

Á þingi sambandsins kom ýmislegt fram í setningarræðu formanns, Björns Snæbjörnssonar. Slagorð þingsins er Samstaða og samvinna. Innan SGS eru nú 19 félög en voru 50 við stofnun. Stærri og öflugri einingar hafa orðið til. Í dag er ekki vitað hvenær og á hvern hátt ríkisstjórnin mun færa niður verðtryggðar skuldir heimila. Enn síður er vitað hvaða áhrif aðgerðir muna hafa á ráðstöfunartekjur. Greinileg færi eru til að bæta kjörin ef tekið ef mið af arðgreiðslum og skattalækknum á útflutningsgreinar. Það er afar mikilvægt að jafna launakjör karla og kvenna í heild sinni. Jöfnun lífeyrisréttinda og rýmkun veikindaréttinda eru mikilvæg baráttumál. Eitt brýnasta máls dagsins er að fólk hafi aðgang að húsnæði á viðáðanlegu verði. SGS vill hafa samstarf við stjórnvöld um húsnæðiskaup og leiguhúsnæði á félagslegum grunni. Ein helsta ógnin við SGS og hagsmuni félagsmanna er svört atvinnustarfsemi. Einhver hluti ferðaþjónustufyrirtækja virðist starfa utan laga og kjarasamninga. þrátt fyrir fögur orð var ekkert samráð við SGS við gerð fjárlagafrumvarps og svikin loforð í upphafi lofa ekki góðu um framhaldið. Ef menn tala um samráð á að vera samráð. Ef ekki þýðir það að menn eru ekki virtir viðlits. Lykilatriði í skattamálum er hækkun persónuafsláttar. Atvinnuleysið er ekki horfið og hluti þess er falinn. þar er verk að vinna.