SDG og skýrsla AGS.

Í viðtali við ruv.is segir SDG að sér hugnist ekki pólitísk stefna AGS að öllu leyti. Hann telur sjóðinn hafa ranga skoðun á hugmyndum Framsóknar á leiðréttingu skulda heimila. SDG heldur því fram að AGS sé þeirrar skoðunar að ríkissjóður verði að taka lán til að greiða niður verðtryggð lán heimila.  Þetta verður að teljast mjög merkileg túlkun á efni skýrslunnar. Á bls. 16 (og víðar) er fjallað um þær hugmyndir að fjármagna leiðréttingu skulda með því að semja við erlenda kröfuhafa um útstreymi fjár á mjög lágu gengi krónu. Í reynd þýðir þetta að ríkissjóður tekur til hluta af fjármunum erlendra kröfuhafa. AGS bendir á að mikil óvissa sé um framkvæmd og upphæð í slíkri framkvæmd. Auk þess er bent á að skynsamlegra sé að nota slíka fjármuni til að lækka ríkisskuldir. það er skynsamleg skoðun að slíkir fjármunir eigi að nota þannig að þeir nýtist öllum en ekki fyrst og fremst þeim sem tóku verðtryggð lán á ákveðnu tímabili. Ekki er hægt út frá þessu dæmi að segja að SDG hafi alls ekki lesið skýrsluna en hann hefur ekki lesið hana vel eða að hann snýr út úr og talar gegn betri vitund.

Forsætisráðherra fer með rangt mál.

Eftir langa dvöl í Kanada er SDG kominn til landsins og virðist hafa tekið til starfa. En öll byrjun er erfið og ráðherrann lýsir því nú yfir að svokallaðir ipa styrkir hafi verið til þess eins að koma landinu inn í ESB. Sönnun þess er sú segir ráðherrann að ESB hafi hætt styrkveitingum þegar Ísland gerði ótímabundið hlé á aðildarviðræðum(aðlögunarferli í orðræðu ráðherrans). Þetta kemur mönnum spánskt fyrir sjónir. Styrkirnir eru ætlaðir ríkjum sem eru í aðildarviðræðum eða hafa sýnt skýran vilja um að hefja slíkar viðræður. Ísland fékk styrkina á grundvelli erfiðleika eftir hrun og öll hafa styrkt verkefni miðast við að nýtast stjórnsýslu landsins og stofnunum hvort sem til aðildar kæmi eða ekki. Forsætisráðherra ætti að vera kunnugt um það að ákvörðun um aðild er tekin af þjóðinni í almennri atkvæðagreiðslu. Norðmenn hafa þannig í tvígang hafnað aðildarsamningi í þjóðaratkvæðagreiðslu. Utanríkisráðherra stöðvaði viðræður og þar með fellur niður réttur til styrkja. Málatilbúnaður forsætisráðherra er heldur daufur áróður en kannski var hann of lengi í útlöndum. Kannski hefði hann átt að vera á landinu og sinna brýnum vandamálum þjóðarinnar. Þau verða ekki leyst með töfrabrögðum og þau leysa sig ekki sjálf.

Kosningar í Noregi eftir mánuð.

Höyre er í mikill sókn og samkvæmt einni spá er fylgið 31.2% og flokkurinn myndi fá 56 þingmenn. Verkamannaflokkurinn er með 29.6% þannig að bilið er nokkuð. Framfaraflokkurinn er eini borgaralegi flokkurinn sem tapar fylgi og það er því Erna Stolberg en ekki Siv Jensen sem er leiðtogi hægri vængsins. Sv fær 3.7% í könnunum og einn þingmann. Græningjar fá 2.7%. Margir flokkar eru því rétt við mörkin að komast á þing og það gerir óvissuna enn meiri um úrslit. Það er því mikil óvissa um úrslitin en ljóst að Erna Solberg og flokkur hennar leiða baráttuna. En sigur er ekki unninn fyrirfram. Kosningavél Verkamannaflokksins er afar öflug og á henni og nánu samstarfi við LO verkalýðshreyfinguna hefur flokkurinn byggt völd sín. Flokkurinn verður því að koma með sterk og óvænt útspil á næstu vikum. (Klassekampen.no)

Forsætisráðherra ríkisstjórnar Íslands.

Hann er fæddur 1975 og er því 38 ára gamall. SDG varð stúdent frá MR 1995. 2005 lýkur  hann BS prófi frá viðskipta-og hagfræðideild Háskóla Íslands. Þetta eru einu próflok sem skráð eru.  Auk þess stundaði hann fjölmiðlanám við sama skóla. Hann stundaði nám við Kaupmannarhafnar Háskóla og Háskólann í OXford í stjórnmálafræði, hagfræði og skipulagsfræðum. Hann var fréttamaður og þáttastjórnandi í hlutastarfi hjá Ruv.is á árunum 2000 til 2007.  Samkvæmt ferilskrá hans á vef Alþingis er þetta eina starfsreynslan. Hann var kjörinn á Alþing 2009. Frá sama ári hefur hann verið formaður Framsóknarflokksins. Hann var fulltrúi í skipulagsráði Reykjavíkurborgar 2008 til 2010. Nú hefur frami SDG verið afar skjótur. Ungur aldur hans og takmörkuð reynsla af þjóðmálum vekja athygli.  þrátt fyrir langa dvöl við erlenda háskóla lýkur hann ekki formlegum prófum. Strax í haust mun reyna á hæfni SDG og nánustu samstarfsmanna hans að glíma við mjög erfið og mörg vandamál. Sagan mun leiða í ljós hvort SDG var réttur maður á réttum stað.