Rauða kverið kemur aftur.

Byltingin er ekki teboð skrifaði Mao formaður og í dag er þessi setning enn vinsæl hjá Kínverjum. Nú á að gefa Rauða kverið út aftur í þremur mismunandi útgáfum. Viðhafnarútgáfan mun kosta sem svarar 40 þúsundum íslenskra króna. Chen Yo heitir útgefandinn og hann kennir í herskóla í Peking. Rauða kverið var til í bókahillum 68-kynslóðarinnar. Á ensku var hún kölluð little red book álíka og little black dress. Á tímum menningarbyltingar í Kína var algerlega nauðsynlegt að hafa Rauða kverið á sér. Það var fylgst með því að stúdentar væru með bókina á sér og það þótti eftirsóknarvert að kunna utanað greinar og geta vísað í blaðsíðutal. 1964 var Kverið fyrst gefið út og 1968 var upplagið orðið einn milljarður eintaka. Aðeins Biblían hefur betur. Lin Pio stýrði útgáfu en hann féll í ónáð snemma á 8. áratugnum. Eftir dauða Mao 1976 var bókin ekki endurútgefin. Það er vaxandi áhugi á Mao og valdatíma hans í Kína í dag. Gamlir byltingarsöngvar heyrast og söguleg leikrit eru sett á svið. Kína er mesta iðnaðarríki heimsins en auðvitað ekki kommúnískt samfélag í skilningi Karl Marx. Kannski boðar útgáfa Rauða kversins að ný-maoistar séu að eflast?