Fær Snowden hæli í Þýskalandi?

Vaxandi áhugi er á því að veita Snowden hæli í Þýskalandi. Þekktir blaðamenn, leikarar, skemmtikraftar og stjórnmálamenn-fyrrverandi og núverandi-lýsa þeirri skoðun sinni að Snowden sé velkominn til Þýskalands. Heiner Geisler fyrrum aðalritari CDU (flokks Merkel kanslara) er í þessum hópi. Honum þykir leitt að sambandið við USA hafi versnað en Snowden hafi gert vestrænum ríkjum mikinn greiða og nú se kominn tími til að endurgjalda greiðann. Margir áhrifamenn í SPD-jafnaðarmannaflokknum- hafa einnig lýst þessari skoðun. Snowden afritaði gögn hjá NSA-Þjóðaröryggisstofnun USA- og fór með þau úr land. Hann hefur tímabundinn dvalarrétt í Rússlandi. Sá sem segir sannleikann fremur engan glæp segir Snowden. Hann er reiðubúinn að bera vitni fyrir rannsóknarnefnd þýska þingsins en tryggja verður öryggi hans. Merkel er í klemmu; á hún að hætta á að gera sambandið við USA enn erfiðara en áður?

Kirkjugarðurinn óttast dauðann.

Kirkjugarðurinn í Hamburg Ohlsdorf hefur áhyggjur af viðskiptavinum. Þeim fer fækkandi. Eitt sinn skal hver deyja en Þjóðverjum fækkar og margir kjósa bálför. Reglugerð um grafir segir að lengd skuli vera 213 cm, breidd 83 cm og dýpt 170 cm.Kirkjgarðurinn er 391 hektari eða níu sinnum stærri en Vatikanið. Þar hvíla ein og hálf miljón látinna. 300 starfsmenn eru í krikjugarðinum og hver greftrun  rekur aðra eins og um færibandavinnu væri að ræða. Hér hvíla frægir menn og konur. Leikararnir Hans Alberts og Gustaf Grundgens. Hér hvílir klámstjarnan Sexy Cora en hún dó i brjóstastækkunaraðgerð. Látnum er raðað niður eftir þjóðerni á svæðum kirkjugarðsins. Kínverjar eru á bp 68 og Svisslendingar á L 14-15. En nú fækkar viðskiptavinum og það gætu orðið endalok garðsins. Ef hann á að lifa áfram þarfnast hann dauðra. Rómverska kaþólska kirkjan lagði blessun sína yfir bálfarir 1963 og síðan þá hefur fjöldi þeirra vaxið stöðugt. Dauðinn er vara á markaði og þar ríkir samkeppni. Einkareknar bálfararstofur eru víða í Hamborg og nokkrar á iðnaðarsvæðum.  Það er hægt að láta brenna lík í Póllandi en koma öskunni fyrir í Þýskalandi. Kaupmáttur og verðskyn ráða ferðinni. Dauðinn er tabú. Menn deyja ekki. Menn fara. En þeir skilja eftir sig minnismerki. 

Yfirgefa unglingar Facebook?

Svo virðist sem unglingar í USA séu að missa áhugann á Facebook. Facebook hefur næstum verið til alla ævi 13 ára unglinga. Hún er jafn hversdagsleg og McDonald og Nike. 23% unglinga nota nú bókina og hefur talan lækkað mikið allt þetta ár. Twitter er á svipuðu róli eða 26%. Instagram er á uppleið talan fyrir þann vef er 23%. En þeir sem nota aðra vefi eru 17% og sú tala hækkar stöðugt. Facebook er semsagt ekki lengur cool. Unglingar eiga að jafnaðu 300 vini á bókinni en 80 fylgjendur(nýyrði) á Twitter. Og gamanið felst í því að lesa það sem vinir eða fyrrverandi vinir skrifuðu á vegginn sinn. En hvað varð um kynslóðabilið og unglingamenninguna? Unglingar skapa sér eigið félagslegt svæði með málfari, tísku, viðhorfum , klæðnaði, tónlistarsmekk og áhugamálum. Með því skapa þeir fjarlægð frá foreldrum og öðlast meira sjálfstæði. Hefur Facebook nú breytt þessu öllu? 70% unglinga eru vinir foreldra sinna á bókinni. Það getur verið vandræðalegt fyrir ungling í framhaldsskóla að sjá að móðir hans hefur sett mynd af honum mjög ungum með pela á bókina. Unglingar segja frá ýmsu í félagslífi sinu sem er aðgengilegt fyrir foreldra. En á hvaða leið eru unglingarnir? Hingað meðal annars : snapchat, pheed, Piscart, tumblr og vine.

Hefur fangelsisvist foreldra áhrif á börn?

Í nýlegri danskri rannsókn kom í ljós að 6% barna sem fæddust milli 1980 og 1985 áttu foreldri sem setið hafði í fangelsi einu sinni eða oftar. Þessi börn eru líklegri til að fremja afbrot síðar á ævinni en þau börn sem ekki eiga foreldra sem hafa reynslu af fangelsisvist. Börnin voru einnig líklegri til að eiga í erfiðleikum í skólakerfinu. Börnin voru einnig líklegri til að fá dóm fyrir þjófnað á aldrinum 19 til 29 ára. Þetta á hins vegar aðeins við um lítinn hóp af öllum þeim börnum sem eiga dæmda foreldra. Af þessu leiðir að ef börnin standa á veikum grunni hvað varðar efnahag og félagstengsl þá hefur glæpahneigð foreldra áhrif. Ef báðir foreldrar eru dæmdir til fangavistar hefur það merkjanleg áhrif á börnin. Bloggara er ekki kunnugt um að þetta viðfangsefni hafi verið rannsakað hér á landi.

Kaupaukakerfi Arionbanka.

Brennt barn forðast eldinn segir máltækið. Umfangsmikið kaupaukakerfi hefur verið tekið upp í bankanum. Nær það til 100 starfsmanna og geta kaupaukar numið 25% af árslaunum. Bankinn telur að samkeppnisaðilar um starfsfólk hafi tekið upp slíkt kerfi(sic) og verði bankinn því að aðlaga sig. Svo virðist sem stjórnendur banka og fjármálastofnana hafi ákveðið að koma á launaskriði í fjármálageiranum. Ljóst er þó að það nær ekki til nema til stjórnenda og millistjórnenda. Það virðast vera peningar í bankakerfinu öfugt við mörg heimili landsins. Íslandsbanki greiddi 68 milljónir í kaupauka á síðasta ári en því miður(?) eingöngu til framkvæmdastjóra. Starfsmenn Landsbankans fengu í sumar hlutabréf en upphæðin var 4.7 milljarðar fyrir skatta. Ekki eru allir strafsmenn jafnir eða vinna jafn mikilvæg störf hjá Arion banka að mati stjórnenda. Þeir eru mikilvægastir sem hafa áhrif á tekjur og kostnað bankans í störfum sínum. Stjórnendur sjálfir greina á milli. Árið 2011 sendi Fme frá sér reglur um kaupaukakerfi fjármálafyrirtækja. Þær birtust í Stjórnartíðindum og eru undirritaðar af Gunnari Þ Andersen. Í 4. grein er tekið fram að kaupaukakerfi skuli miða að því(sic) að kaupaukar hvetji ekki til óhóflegrar(sic) áhættutöku. Áhættustýring, innri endurskoðun og regluvarsla eiga að fylgjast með framkvæmd kerfisins. Kaupaukar eru árangutengdir nema ráðningarkaupaukar en þeir eru leyfilegir við ráðningu starfsmanna á fyrsta ári. Sagan endurtekur sig. Fyrst sem harmleikur en síðan sem gamanleikur.

Staða ríkisfjármála; áróður og veruleiki.

1. þáttur ; áróðurinn.

Þann 12. 6. héldu SDG og BB blaðamannafund í Þjóðmenningarhúsinu. Sögðu þeir dökkar horfur vera í ríkisfjármálum. SDG sagði ljóst að fjárlög ársins myndu ekki ganga eftir. Staða rikissjóðs væri verri og lakari en áætlanir gerðu ráð fyrir. Þeir félagar töldu sig vera að upplýsa fyrir blaðamönnum á fundinum og þar með þjóðinni hver væri raunveruleg staða ríkissjóða.

2. þáttur ; veruleikinn.

Ríkisendurskoðun sendir frá sér skýrslu um framkvæmd fjárlaga á fyrri helming ársins. Þar kemur fram að afkoma ríkissjóðs hafi verið betri en áætlað var. Rekstrarhalli var 16.7 milljarðar króna en hafði verið áætlaður 21 milljarður. Gjöld voru tæpum 8 milljörðum króna lægri en áætlað hafði verið og tekjur lítilllega hærri en áætlað hafði verið.

Niðurstaða; SDG og BB eru snillingar. 

 

Atvinnulýðræði á vinnustöðum.

Þingsályktunartillaga VG sem lögð var fram á Alþingi í dag er allrar athygliverð. Skipa á nefnd sem gera á tillögur um atvinnulýðræði hjá einkafyrirtækjum og fyrirtækjum í opinberri eigu. (Í plagginu er einnig nefnt atvinnulýðræði meðal nemenda í skólum en það verður látið liggja milli hluta.) Markmið atvinnulýðræðis er að auka áhrif starfsfólks á vinnustöðum. Orðalagið er afar óljóst og opið hvort sem það er viljandi eða ekki. Nefndin skal athuga að hve miklu leyti atvinnulýðræði verði komið á með lögum og að hve miklu leyti með samningum. Ekkert er minnst á stjórnun en margar hugmyndir í stjórnunarfræðum leggja áherslu á þátttöku og virkni starfsfólks. Í greinargerð eru raktar fyrri tillögur sem komið hafa fram á Alþingi um þetta efni. Þær hafa verið fjölmargar á undanförnum áratugum. Menn hafa m.a. litið til Svíþjóðar og Þýskalands sem fyrirmynda. Ætla mætti að hugmyndir um atvinnulýðræði féllu í góðan jarðveg hér á landi. Fyrirtæki er lítil-örfyrirtæki á alþjóðlegan mælikvarða-samskipti eru óformleg og einkennast af nálægð milli fólks. Hópurinn er meira en summa einstaklinganna stendur á einum stað og með atvinnulýðræði væri hægt að virkja sköpnarmátt hópsins. Eigandi fjármagnsins í einkafyrirtæki er jafnframt eigandi fyrirtækisins en án skipulags og starfsmanna verður engin verðmætasköpun. Mikilvægustu ákvarðanir snerta fjárfestingar og stefnumótun fyrirtækis. Það er því mikilvægt að starfsmenn hafi áhrif á þessum sviðum.

 

 

Af hverju er ekki verðhjöðnun á evrusvæðinu?

Þessi spurning var sett fram í grein í þýsku útgafu WSJ í lok júlí í sumar. Það er mjög margt í hagkerfum landanna sem bendir til þess að verðhjóðnun gæti orðið veruleiki en af hverju er hún ekki löngu komin. Samdráttur hefur orðið í landsframleiðslu Spánar, Portúgals, Ítalíu,  Írlands og Grikklands. Samdráttur í Grikklandi er langmestur eða 20%. Í öllum þessum löndum hefur verið verðbólga nema á Írlandi 2009 til 2010. Verðhjöðnun er það sem Seðlabankar allra landa óttast mest. Menn horfa til reynslu Japana á tíunda áratugnum. Evrópski Seðlabankinn getur ekki beitt sér með sama hætti og aðrir seðlabankar af stjórnmálalegum ástæðum. En hvað kemur þá í veg fyrir verðhjöðnun? Í mörgum löndum er halli á fjárlögum ríkisins og því er mætt með hækkandi sköttum. Hærri neysluskattar viðhalda verðbólgu. Raunlaun fara lækkandi og það gefur fyrirtækjum tækifæri til að hækka álagningu á vörum og þjónustu. Á Ítalíu minnkar einnig  framleiðni. Í júní voru verðhækkanir í ofangreindum löndum ákaflega litlar og aðeins á Spáni var meiri verðbólga en 2%. Draghi bankastjóri segir að markmiðið sé 2%. Of mikil verðbólga er jafn slæm og of lítil. Reynsla Japana sýni hins vegar að land sem lendi í verðhjöðnun sé mjög lengi að á sér uppúr henni.

Útgjöld félagsþjónustu sveitarfélaga 2012 sýna batamerki í hagkerfi.

Árið 2012 fengu 7736 heimili félagsaðstoð frá sveitarfélögum. Árið 2011 voru það 7715.  Aukning er 0.3% og það er mikil breyting frá því sem verið hefur undanfarin ár. Árin 2007 til 2011 var árleg fjölgun um 860 á ári. Heimilum sem nutu aðstoðar fjölgaði úr 4280 í 7715. Tæplega helmingur heimila var atvinnulaus og tveir þriðju eða 2270 einstaklingar án bótaréttar. Tæp 4% þjóðarinnar bjuggu a heimilum sem fengu fjárhagsaðstoð. 5.3% allra barna á Íslandi bjuggu á þessum heimilum. Það eru 4190 börn sem eru 17 ára og yngri. Einstæðar mæður með börn eru 27% þeirra heimila sem njóta fjárhagsaðsoðar. Einstæðir barnlausir karlar eru 43% þeirra heimila sem njóta fjárhagsaðstoðar. Vegin meðalgrunnfjárhæð til einstaklings 18 ára og eldri var 147350 á mánuði árið 2012. 

Snowden skrifar Merkel kanslara Þýskalands bréf.

Þingmaður Græningja H. C. Ströbele hitti Snowden  í Moskvu. Hann mun færa kanslaranum bréfið. Á þessri stundu er óvíst hvort Snowden getur borið vitni fyrir þingnefnd. Kerry utanríkisráðherra USA hefur viðurkennt að njósnastofnanir hafi gengið of langt. Emerson sendiherra USA í Þýskalandi segir að þýskir þingmenn ákveði það sjálfir hverja þeir hitti. Það sé að sjálfsögðu réttur þeirra. Snowden hefur lýst yfir áhuga á að taka þátt í að upplýsa hlerunarmálið í Þýskalandi. Það er hins vegar afar flókið að hann komi til Þýskalands og beri vitni. Ef Snowden fer frá Rússlandi missir hann sjálfkrafa leyfi sitt til að dvelja þar. Mögulegt er að hann beri vitni án þess að fara til Þýskalands en þá er málið komið á borð ríkjanna tveggja. Snowden situr því fastur í Moskvu.