Reiði og réttindi fanga á Litla Hrauni.

Formaður hagsmunasamtaka fanga er reiður vegna stjórnunarhátta í fangelsinu. Hann segir reiðina almenna. Hverjar eru ástæður? Íþróttahúsi hafi verið lokað án skýringa. Nú vitum við ekki hvort þetta er rétt þar sem enginn annar var til frá sagnar þegar blaðamaður MBL vann frétt um málið. Annað var að ruðst hafi verið inní gestaherbergi þar par var í ástaratlotum. Þetta kemur spánskt fyrir sjónir. Við komu á Litla Hraun fá fangar bækling með upplýsingum  um fangelsið. Þessi bæklingur er að sjálfsögðu aðgengilegur á netinu. Þar er talað um heimsóknir, hvenær þær fari fram, um leyfi og svo framvegis. Hvergi er minnst á aðstöðu til að stunda kynlíf ;) Fangaverðir hafa rétt til að leita á öllum sem koma í heimsókn en mér skilst að það sé einnig umkvörtunarefni. Formaðurinn virðist vera að hafa í hótunum. Það gæti eitthvað alvarlegt gerst ef ástandið lagast ekki. Hann nefnir einn merkilegan hlut. Hann telur af langri reynslu og mikilli þekkingu á fangelsum að endurkomutíðni fari hækkandi. Ef rétt er þá er það mikið umhugsunarefni.

Ársreikningur Sjálfstæðisflokksins 2012.

Á vef Ríkisendurskoðunar má sjá útdrátt úr ársreikningi flokksins. Þar er margt fróðlegt. Framlög lögaðila til flokksins voru 17.5 milljónir sem er mun meira en framlög til allra annarra flokka samanlagt.(xB 7.4, xS 2.2, x VG 0.3). Gott er að eiga góða vini og margir eru rausnarlegir: Auðbjörg ehf,Brim hf, Gjögur hf, HB Grandi hf, Hraðfrystihúsið-Gunnvör hf, Ísfélag Vestmannaeyja hf og Vinnslustöðin hf, svo nokkrir séu nefndir. Óháður endurskoðandi gerir athugasemd sem er athyglisverð. Hann ritar;stjórnendur hafa reynt að greina félög í ríkiseigu og félög sem eru tengd. Erfitt reynist að að sannreyna hvort það hefur tekist með tæmandi hætti.  Sem sagt: er ekki hægt að sannreyna að farið sé að lögum?

Svört atvinnustarfsemi í ferðaþjónustu.

Áætlað er að 1500(!) herbergi á höfuðborgarsvæðinu séu leigð erlendum ferðamönnum ólöglega. Á landinu öllu eru þau talin vera 1800. Þessar tölur eru varlega áætlaðar út frá erlendum vefsíðum. 3000 herbergi eru í löglegum rekstri í Reykjavík og sýnir hlutfall þessara talna umfang svartrar starfsemi. Svört atvinnustarfsemi virðist vera að vaxa þrátt fyrir að ýmislegt hefur verið gert. Það er alveg ljóst að skattyfirvöld verða að beita sér af miklu meiri krafti en hingað til. Til þess þurfa þau m.a. eindreginn pólitískan stuðning. Ólögleg atvinnustarfssemi veldur miklum skaða. Hún skekkir samkeppnisstöðu. Starfsfólk verður réttlaust og starfsöryggi ekkert. Hún hefur neikvæð áhrif á skattasiðferði og á siðferði almennt. Það eru fáir sem græða og þeir græða á kostnað allra hinna. Um umtalsverðar upphæðir er að ræða. Samkvæmt tölum frá Rannsóknarsetri verslunarinnar sem birtar voru í lok október var greiddi hver erlendur ferðamaður 89000 með greiðslukortum í september. Stæðsti einstakiliður er gistiþjónusta en kortavelta á gististöðum var 1.6 milljarður þennan umrædda mánuð. Það er 26% aukning frá sama mánuði í fyrra. Þessar tölur hafa sínar takmarkanir. Ef greitt er fyrir ólöglega gistingu t.d. í gegnum paypal  kemur greiðslan ekki fram í þessum tölur. Hægur vandi er fyrir skattyfirvöld að hafa samstarf við greiðslufyrirtækin.

Borgarastríðið í Sýrlandi; 100000 látnir.

Tvær milljónir manna hafa flúið landið. Efnavopnum hefur verið beitt. SÞ meta það svo að 40% íbúa landsins þurfi á aðstoð að halda. Það eru 9.3 milljónir manna. Af þeim eru 6.5 milljónir sem hafa yfirgefið heimili sín eða verið hrakin þaðan. Ástandið versnar hratt. Sýrlendingar eru uþb 23 milljónir. Valeri Amos ræddi þessi mál á lokuðum fundi Öryggisráðsins. Það verður að tryggja skjóta aðstoð og tryggja öryggi starfsmanna SÞ.  Í bókstaflegum skilningi er um líf og dauða að tefla. Líbanon sem er minnsti nágranni Sýrlands hefur tekið við flestum flóttamönnum eða 600000. 200000 flóttamenn eru í Tyrklandi. (Aljazeera).

Ný stéttabarátta? Bill de Blasio borgarstjóri í New York.

Allt bendir til þess að demókratinn og vinstrisinnin Bill de Blasio muni sigra í komandi kosningum. Hann mun þá stjórna risaborg með 8.3 milljónum ibúa  og miklum vandamálum. Hann heldur kosningabaráttunni ótrauður áfram allt til síðustu mínúti. Hann hittir kennara, fer í gospelmessu og heldur ræðu á fundi flokksmanna í Brooklyn. Við hann eru bundnar ýmsar vonir. Hann tekur við af Bloomberg sem hefur stjórnað borginni með harðri hendi eins og hún væri risafyrirtæki. Bill talar gegn efnahagslegu misrétti. Hann boðar skattahækkanir á ríkt fólk. Fjölskylda hans er fjölmenningarleg. Kannski er hann tákn um nýja tíma í New York og USA. Fjármálakreppan og vaxandi bil milli ríkra og fátækra hefur fært yngri hluta kjósenda til vinstri. Hvergi eru andstæðurnar jafn augljósar og í New Yor. Lúxusíbúðir á 95 milljónir dollara og 12000 heimilislausir. Í New York búa 400000 milljónamæringar og 70 milljarðamæringar í dollurum. 1700000 lifa undir fátæktrarmörkum. Bill de Blasio er eins og Hrói Höttur. Hann ætlar að taka peninga frá ríka fólkinu og láta fátæka fá. Hann vill leggja skatt á auðmenn til að fjármagna byggingu leikskóla. En hann fær fjárstuðning frá ríkum vinum Hillary Clinton. Allt er afstætt. (Spiegel).

Gerendur kynferðisofbeldis gegn börnum.(2)

Barnaníðingar eru líklegri en nauðgarar og ofbeldismenn að þjást af þunglyndi og kvíða. Margir barnaníðingar sýna litla félagslega færni. Þeir eru feimnir og ómannblendnir. Mjög ólíklegt er að þeir séu undir áhrifum vímugjafa þegar þeir fremja brotið. Mikill meirihluti barnaníðinga játar brot sín. 

Barnagirnd er að einhverju leyti líffræðileg. Hún er sterk og síendurtekin kynþörf og kynórar gagnvart börnum. Sterkasta form barnagirndar er ef einstaklingur hefur eingöngu áhuga á ungum börnum en engan á fullorðnum einstaklingum. Slíkir einstaklingar eru mjög sjálfhverfir og sjálfselskir. Þeir telja að börnin hafi áhuga á þeim og samskiptin hafi þroskavænleg áhrif á barnið. Þeir upplifa enga vanlíðan vegna hegðunar sinnar. Þeir telja að barnið hafi tælt þá til athæfisins. Ekki er hægt að lækna barnagirnd eða engin aðferð hefur fundist hingað til. Hins vegar er hægt að minnka löngun eða þörf og einnig hæfni til að stjórna löngun. Líklegast er að barnagirnd sé samspil líffræðilegra þátta og umhverfisþátta. Hún mun þá þróast og mótast á táningsaldri.  Klám er mikilvægur umhverfisþáttur. Það er auðveldlega aðgengilegt fyrir unglinga. Klám er ekki kynfræðsla en getur haft mikil áhrif á kynhegðun og kynhneigð. Allt það sem miðar að kynheilbrigði unglinga er af hinu góða. Það er mikilvæg forvörn. Hitt er að fylgja þeim eftir sem hafa gerst brotlegir og hafa setið af sér dóm. Eitt er öruggt; þeir hafa ekki læknast af barnagirnd á Litla Hrauni. Þeir koma út óbreyttir með sömu þrár.  

Gerendur kynferðisofbeldis gegn börnum.

Vitundarvakning hefur orðið um vernd barna gegn kynferðisbrotum. Hún birtist með margvíslegum hætti; sem barátta gegn klámvæðingu og vændi, sem kynfræðsla með unglinga um hvað telst heilbrigð kynhegðun og sem mikil og tilfinningaþrungin umræða um dæmda barnaníðinga og refsingar. Þolendur og gerendur fá mjög ólíka umfjöllun. Minna er um gerendur talað-nema þá um væga dóma sem þeir fá-og oft einkennist umræðan af sterkum tilfinningum og fordæmingu. Nú eru þessi mál flókin eins og annað í samskiptum manna. Til að mynda er gerður greinarmunur á barnagirnd og barnaníði. Barnagirnd er sálræn röskun í flokkunarkerfi lækna og sálfræðinga. Þeir sem brjóta gegn börnum eru oft haldnir barnagirnd en þurfa ekki að vera það. Einstaklingar fæðast ekki sem kynferðisafbrotamenn en þeir verða það vegna áhrifa umhverfis og geðtengsla við mikilvægar persónur í lífi þeirra. Margir fræðimenn telja að klám eigi stóran þátt í því að raska kynheilbrigði einstaklingsins. Börn eru beitt kynferðisofbeldi með ýmsum hætti. Um er að ræða áreitni eða beina snertingu. Brot eru misalvarleg miðað við áhrifin á börnin. Fyrst má nefna kynferðislegan talsmáta við börn. Annað er að sýna barni kynfæri eða stunda sjálfsfróun fyrir framan barnið. Þriðja er að snerta kynfæri barnsins. Fjórða er að hafa munnmök eða láta barnið sleikja kynfæri. Fimmta stig er fullt samræði við barn. Tölur um kynferðislegt ofbeldi hér á landi er háar. Í rannsókn frá 2012 kom í ljós að 13% stúlkna og 3% drengja höfðu orðið fyrir kynferðislegu ofbeldi fyrir 18 ára aldur. Gerendur eru oft velliðnir, vinsamlegir og vingjarnlegir. Algengt er að þeir séu eldri en þrítugir við fyrsta brot. I mörgum tilvikum hefur geðtengslamyndun í bernsku verið slök. Félagshæfni, tilfinningastjórn og sjálfsmat hefur skaðast þess vegna. Gerendur eru sjálfhverfir og líta  ekki á þá sem þeir brjóta á sem jafningja. Þeir sem brjóta gegn börnum eru ekki allir haldnir barnagirnd. Nokkrar erlendar rannsóknir telja að hlutur barnaníðinga sé 60-75%. Hér á landi hafa 235 dómar fallið í brotaflokknum kynferðisbrot gegn börnum frá 1985. Meðalaldur brotamanna er 36 ár og ítrekunartíðni er lág eða 3%. 50% gerenda eru tengdir þolanda á einhvern hátt. Svo sem : feður, fósturfeður, frændur, fjölskylduvinir eða nágrannar. Í 10-20% tilvika eru gerendur ókunnugir þolanda. (framhald).

Samtök breskra iðnrekenda vara við útgöngu úr ESB.

Andstæðingar og hatursmenn ESB hafa ráðið pólitískri umræðu nú um nokkurt skeið á Bretlandi. Cameron hefur tilkynnt þjóðaratkvæðagreiðslu um málið. Nú eru fylgjendur ESB að ná vopnum sínum. Í könnun á vegum CBI kom í ljós að 80% stjórnenda fyrirtækja vilja vera í ESB. Af stjórnendum lítilla og meðalstórra fyrirtækja vildu 77% vera í ESB. CBI eru samtök iðnrekenda og Gridland formaður segist ekki vilja vera áhrifalaus útan sambandsins. Samtökin hafa lagt fram ítarlega skýrslu. Þar kemur fram að Bretland hafi greitt hafi greitt 7.3 milljarða nettó til ESB. Landsframleiðsla Bretlands er hins vegar 4-5% meiri en ella vegna ESB aðildar. Það eru 62 til 78 milljarðar punda eða 3000 pund á hvert heimili. Nú ber að taka þessum tölum með nokkurri varúð. Það er  afar flókið að reikna út kostnað og hagnað við aðildina. Cameron er í nokkrum vanda. Hann vill vera áfram í ESB en hann verður að friða óánægjuraddir í eiginn flokki. Þeim er vinnulöggjöf og velferðaráherslur ESB þyrnir í auga. UKIP er eini flokkurinn sem vill ganga úr ESB. Verkalýðsfélögin vilja vera inni. Skoðanakannanir sýna að mjótt er á munum milli fylkinga. CBI segir að útganga sé ekki endalok alls en hún myndi þýða versnandi lífskjör og minni þjóðarframleiðsla. (Spiegel).

München; Picasso innan um niðursuðudósir.

Þetta er skelfilegt. Sérvitringur virðist hafa safnað verkum frægra málara áratugum saman og falið þau í íbúð sinni. Hvað verður um verkin er óljóst. Heimatilbúin húsgögn og rotnandi matur. Í þessu umhverfi eru verk eftir Picasso, Chagall, Nolde, Mattise og Splitweg. Verkin eru metin á milljónir evra. Listaverkafjársjóður finnst í óásjálegri íbúð. Þetta gæti verið byrjun á sakamálasögu og kannski verður það reyndin. Hinn grunaði er áttræður og 2010 fundu tollverðir í Sviss 9000 evrur í seðlum í tösku hans. Þetta leiddi til þess að dómari gaf leyfi til að leita í íbúð mannsins. Í íbúðinni var neglt fyrir alla glugga. Hún var full af gömlum matælum sem höfðu runnið út fyrir áratugum sum hver. Faðir hins grunaða var þekktur listaverkasali á árunum fyrir seinni heimsstyrjöld. Þegar nasistar komust til valda missti hann stöðu sína sem yfirmaður safns í Hamborg. Hann var af gyðingaættum. Hann fékk hins vegar það hlutverk að kaupa "úrkynjaða" list sem svo var nefnd af nasistum. Hann hafði margvísleg sambönd og keypti málverk á smánarlega lágu verði. Hann gat komið myndunum undan eftir stríðið en þá sagði hann yfirvöldum að myndirnar hefðu eyðilagst í loftárásum. Í tvö ár hafa málverkin verið í geymslu tollyfirvalda og listfræðingar hafa rannsakað þau. Enn hvílir leynd yfir málinu og margt á eftir að koma í ljós.

 

AGS vill minni útflutning Þjóðverja.

Nýlega hafði fjármálaráðherra USA gagnrýnt hversu öflugur útflutningur Þjóðverja er og nú fylgir AGS í kjölfarið. Sjóðurinn vill að Þjóðverjar tilgreini ákveðið hámark sem ekki má fara yfir. David Lipton næstæðsti maður sjóðsins kom þessari skoðun á framfæri við þýska fjármálaráðuneytið. Afar mikill afgangur er á viðskiptajöfnuði Þýskalands og hann skapar ójafnvægi sem hefur neikvæð áhrif á allt evrusvæðið. Á síðasta ári  var afgangurinn á viðskiptajöfnuði meir að segja meiri en í Kína. Á þessu ári bendir allt til þess að afgangurinn verði 200 milljarðar evra. Á fyrri hluta ársins var talan orðin 96 milljarðar sem er 7.2% af vergri landsframleiðslu. Það sem kemur á óvart er hversu hörð og óvægin ummæli bandarískra ráðamanna eru. Þar hefur greinilega orðið breyting frá því sem áður var. Nú er USA ekki fyrirmyndarbarnið í stjórn efnahagsmála. Um það vitna best harðar deilur um skuldaþak ríkisins sem sköpuðu mikla óvissu jafnt innanlands sem utan. Samtök þýskra atvinnurekenda hafa brugðist harkalega við gagnrýni bandarískra ráðamanna: styrkur þýskalands er forsenda í Evrópu. Mikið er flutt út af vðrum vegna þess að þær eru góðar og ódýrar. Málflutningur USA er taktík vegna samninga um fríverslun. Ekki eru allir sammála þessu. IMK sem er hagfræðistofnun tengd verkalýðshreyfingunni segir að að mestu leyti fari afgangurinn sem lánsfjármagn frá Þýskalandi.