Hin hlið skuldakreppu Evrópu.

Ríkissjóðir margra landa hafa tekið lán og skulda mikið. Það er ein hlið málsins. Hin hliðin er að fyrirtæki og heimili skulda einnig mikið. Skuldir heimila eru afar háar á Írlandi og á Spáni. Fyrirtæki eru mjög skuldug í Portúgal og á Spáni. Í löndunum þremur voru skuldirnar mun meira en  tvöföld landsframleiðsla fyrir kreppuna. Þetta var miklu meira en í USA (175%) og Bretlandi (205%). Skuldaniðurfærsla hefur gengið tiltölulega hratt í USA en mun hægar í Evrópu. Ástæður eru einkum þrjár ; í Suður-Evrópu hefur verið fylgt niðurskurðarstefnu sem hefur dýpkað kreppuna og minnkað svigrúm til að lækka skuldir. Í öðru lagi er staða bankanna veik sem hefur takmarkað möguleika þeirra. Í þriðja lagi er evrópsk gjaldþrotalöggjöf skuldurum mun erfiðari en er í USA. Í USA er víða hægt að skila lyklinum og fasteigninni og þar með er skuldarinn laus allra mála. Í Evrópu er þetta ekki möguleiki. Á Ítalíu er gjaldþrotaferlið sjálft langt og kostnaðarsamt en það tekur sjö ár. Húsnæðisskuldir eru sérstaklega háar á Írlandi og í Hollandi. Heimsálfa með uppvakninga-fyrirtækjum og gjaldþrota heimilum mun aldrei blómstra.....

 

Auðlegðarskattur er löglegur og lögmætur. Einnig réttlátur.

Lög um auðlegðarskatt brjóta ekki gegn stjórnarskrá Íslands og fela ekki í sér eignaupptöku. Þetta er niðurstaða Héraðsdóms Reykjavíkur. Stjórnvöld voru því í fullur rétti. Nú mun koma í ljós hvort eigandi Stálskipa áfrýjar málinu til Hæstaréttar Íslands. Fjármálaráðherra hefur marglýst því yfir að óvissa væri um lögmæti þessarar skattheimtu. Hægri menn hafa hamast gegn þessari skattheimtu við öll möguleg tækifæri. Gáfnaljósin á INN.is hafa látið hrægammana geysa og löglærðir þingmenn , hávaxnir jafnt sem lágvaxnir, hafa æft sig í framíköllum : lögleysa, stjórnarskrárbrot!! En hvað gerist nú? Mun Hæstiréttur fjalla um málið? Mun fjársterkur aðili panta lögfræðiálit?

Kvótinn er deilumál í Noregi.

Hæstiréttur dæmdi rauðgrænu ríkisstjórninni hag. Lög um tímabundna kvóta frá 2007 brjóta ekki gegn stjórnarskránni-Grunnloven. 9 af 17 dómurum stóðu að baki ákvörðun Hæstaréttar. Ríkisstjórn hægri flokkana leggur áherslu á að dómurinn takmarki á engan hátt möguleika til nýrrar lagasetningar. Hoyre og Frp vilja að kvóta séu ótímabundnir en nú er það Venstre sem hefur raunverulegt ákvörðunarvald í málinu. Aspaker sjávarútvegsmálaráðherra hefur rætt málið Venstre og Krf en ólíklegt er að stuðnings sé að vænta þaðan. Hjemsdal sem er talsmaður Krf í landbúnaðarmálum og sjávarútvegsmálum hefur sagt að skoðanir flokks hennar séu í samræmi við niðurstöðu Hæstaréttar.Venstre hefur ekki mótað stefnu í þessum málum en flokkurinn vill ræðs grundvallaratriði um nýtingu auðlinda náttúrunnar. Ingrid Heggö , talsmaður Verkamannaflokksins , er annarar skoðunar. Ríkisstjórnin á að viðurkenna að hún hefur tapað málinu segir Ingrid. Helga Pedersen fyrrum sjávarútvegsmálaráðherra segir að dómurinn ætti að fá ríkisstjórnarflokkana til að hugsa sig vandlega um. Ef kvótar verða gerðir ótímabundnir er nær ógerningur að snúa því við. Dómur Hæstaréttar felur í sér að hægt sé að líta á auðlindir hafsins sem sameiginlegar eign. Í flokki SV ríkti mikil gleði yfir iðurstöðu Hæstaréttar. Fiskistofnarnir eiga að vera sameign eins og þeir hafa verið í árþúsundir. Flokkurinn varar við því að veiðirétturinn sé gerður að söluvöru sem hægt er að kaupa, selja og leigja. En framundan er barátta. Það er öllum ljóst. Hoyre ætlar sér að einkavæða fiskistofnana.(klassekampen)

Utanríkisráðherra Þýskalands kallar sendiherra USA á teppið.....

Guido Westervelle hefur boðað sendiherrann á fund í utanríkisráðuneytinu. Þetta er afar óvenjulegt í samskiptum USA og Þýskalands. Ráðherrann mun ræða grun um að sími kanslarans hafi verið hleraður.Málið er litið það alvarlegum augum að það er ekki eingöngu á sviði embættismanna. Samstarf ríkjanna hefur verið mjög náið og bandarísk stjórnvöld vera að upplýsa málið. Margar valdamiklar stofnanir heyra ekki beint undir forseta USA heldur þingið. Það ætti að valda mörgum bæði innan USA og utan hvernig slíkar stofnanir hafa beitt valdi sínu á undanförnum árum. USA er hnignandi heimsveldi en Kína rísandi. Það er öllum ljóst. En á hvaða leið er USA?

Er íslenska krónan fimm gjaldmiðlar?

Nýlega tilkynnti Raul Castro leiðtogi Kúbu að stjórnvöld hyggðust breyta skipulagi gjaldeyrismála í landinu og framvegis yrðu ein tegund peso í landinu en ekki tvær. Kúba er fátækt land og hefur lengst af verið einangrað frá alþjóðlegum viðskiptum. Þjóðartekjur Íslendinga eru hins vegar háar-enn mjög háar þrátt fyrir hrun og kreppu. Í landinu virðast hins vegar vera fimm gjaldmiðlar. Óverðtryggð króna er nafnkrónan og óvarin gegn verðbólgu og verðsveiflum. Allt venjulegt launafólk fær útborgað í slíkum krónum. Verðtryggð krónan heldur verðgildi sínu þrátt fyrir verðbólga. Hún stenst einnig mikil verðbólguskot. Þessi króna heldur verðgildi sínu þótt t.d. laun borguð í nafnkrónur missi verðgildi. Í bókhaldi hvers og eins er því gott að hafa tekjur og eignir í verðtryggðum krónur en útgjöld og skuldir í nafnkrónum. Þá er það aflandskrónan. Þessi króna er krónuinnistæður í erlendum bönkum eða innistæður erlendra aðila í innlendum bönkum. Í fyrra taldi Seðlabankinn að aflandskrónur væru 425 milljarðar. Aflandskrónur geta verið verðbréf eins og jöklabréfin margfrægu. Viðskipti með aflandskrónur fara fram á aflandsgengi. Seðlabankinn hefur gjaldeyrisúboð þar sem hann kaupir gjaldeyri í skiptum fyrir krónur. Þeir sem slíkar krónur kaupa fá þær á afarhagstæðu(m)verði(um) og hafa þess vegna verulegt forskot á aðra sem vilja fjárfesta innanlands. Lýkur nú að segja af krónunni. 

Íslenska krónan og 10.000 kr. seðillinn.

Á morgun fer 10 þúsund króna kallinn í almenna umferð en þó verður hann ekki fyrst um sinn í hraðbönkum. 1981 var myntbreyting eins og margir muna. Þá voru tvö núll tekin af þannig að hundrað krónur urðu að einni. Íslenska krónan á sér alllanga sögu. Hún varð til 1871 með löggjöf 2.1. Landssjóður Íslands gaf út seðlaröð 1885. Seðlarnir voru 5, 10 og 50 krónur. Fyrsta gengisskráning krónunnar fór fram 1922 en krónan hafði þá verið tengd dönsku krónunni í átta ár. 1924 var tekin upp sú stefna að hækka ætti gengi krónunnar sem kom eðlilega illa við útflutningsgreinar. 1939 var gengi krónunnar lækkað með lögum. Stríðið og innstreymi fjármagns breyttu þessu fljótt. 1979 til 1983 var mikil verðbólga í landinu og urðu raunvextir óverðtryggðra lána neikvæðir um allt að 10%. Seðlabanki Íslands tekur 2001 upp formleg verðbólgumarkmið. Á þessari stundu er framtíð krónunnar óljós. Möguleikarnir eru margir : fastgengi, myntráð, dollaravæðing, myntbandalag,fljótandi gengi, upptaka evru(innganga í ESB)......

Var sími Merkel kanslara Þýskalands hleraður?

Svarið er hugsanlega já og ákveðnar vísbendingar benda til þess. Merkel kanslari hefur þegar hringt beint til Obama forseta vegna þessa máls. Líkur eru á að síminn hafi verið hleraður í mörg ár af bandarískum stofnunum. Merkel kanslari mótmælti þessu harðlega í samtali við forseta USA og krafðist þess að málið yrði upplýst að fullu. Málið hefur verið rannsakað af BND(þýsku leyniþjónustunni) og stofnun sem sér um netöryggismál fyrir stjórnvöld. Samkvæmt þessum rannsóknum eru vísbendingar nægilega sterkar til að gera málið opinbert. Talsmaður Öryggisráðs USA hefur lýst því yfir að USA njósni ekki  og muni ekki njósna um kanslarann. Hann svaraði því ekki beint hvort hafi verið njósnað. SPD, jafnaðarmannaflokkur Þýskalands, hefur krafist nákvæmra skýringa frá USA. Hafi verið njósnað er það rof á trúnaði og trausti. 

Evrópskir bankar í álagsprófum; verð á hlutabréfum lækkar.

Um miðjan nóvember mun Evrópski Seðlabankinn hefja umfangsmikla álagsprófun á 124 stærstu fjármálastofnunum Evrusvæðisins. Þetta hafði þegar þau áhrif að verð á  hlutabréfum í nokkrum stórum bönkum lækkaði. Verð bréfa í Santander og Banco Bilbao á Spáni  lækkuðu talsvert og bréf þýska bankans Commerzbank um 4%. það er ljóst að fjárfestar óttast útkomu álagsprófanna. Gerð verður krafa um 8% eiginfjárhlutfall. Áhættumat verður skoðað nákvæmlega. Skoðað verður hvort nægilegt fé sé til að mæta tapi í útlánum. Eru veðin rétt metin?Eru tæki bankanna til inngrips rétt metin? Sett verður á svið kreppuatburðarás og viðbrögð bankanna skoðuð. Fyrir þremur dögum birtist löng grein í The New York Times um Ignazio Angeloni en hann er yfirmaður þeirrar deildar Evrópska Seðlabankans sem sér um fjármálastöðugleika. Blaðið segir að á undanförnum árum hafi stærstu bankar heimsins verið eins og svört box. Enginn skilur hvað gerist innan þeirra hvorki þeir sem stjórna né þeir sem hafa eftirlit. Þannig hurfu Lehmann Brothers í reyk misheppnaðar fjármálasnilldar. Angeloni hefur nú það mikilvæga hlutverk að tryggja traust umheimsins á evrópskum bönkum. Það er mikið í húfi fyrir Evrópu og ítalska hagfræðinginn. 

Sjálfsævisaga Alex Ferguson.

Í 27 ár var Sir Alex Ferguson  þjálfari eins af bestu liðum Englands og heimsins. Hann stýrði liði og fyrirtæki og var alltaf í fjölmiðlum. Alltaf dæmdur til að vera bestur og skara framúr. Nú er hann 71 árs og í stað þess að lesa bók í ró og næði skrifar hann bók. Og þar gerir hann upp reikninga við gamla félaga. Beckham, Kean og Rooney; allt eru þetta helgimyndir í sögu United en nú hreinsar Sir Alex helgislepjuna í burtu. Beckham er leikfang auglýsingamarkaðarins. Kean tjáði sig á skelfilegan hátt. Rooney virðist sambland af rudda og heimsku barni. það var að vísu löngu vitað að hann er ekki skærasta kertið á jólatrénu. Sir Alex hefði getað látið það vera að skrifa þetta en hans eigið ego gat það ekki. Kean hefur þegar svarað fyrrum þjálfara sínum. Ferguson hefur aldrei skilið hvað samstaða og tryggð við félag merkir segir Kean. Sjálfur hefur Ferguson hlotið margvíslega viðurkenningu vegna afreka þeirra manna sem hann gagnýnir nú.  

124 evrópskir bankar í álagsprófum.

Evrópski Seðlabankinn(EZB) mun prófa bankana með ýmsum hætti í nóvember og næstu 11 mánuði. 24 þýskir bankar eru í þessum hópi. Meðal annars er krafist 8% eiginfjárhlutfalls. 2014 á EZB að hafa eftirlit með mikilvægustu bönkum evrusvæðisins. Prófin eru í þremur hlutum og þegar þeim er lokið kemur í ljós hverjir af stærstu bönkum svæðisins fara undir eftirlit EZB. Þýsku bankarnir 24 eru 65% bankageirans og bankarnir 124 eru 85% bankageirans á evrusvæðinu. Gegnsæi skiptir öllu máli segir Mario Draghi bankastjóri. Á síðustu fimm árum hafa bankarnir gert ýmislegt til að styrkja innviði sína fyrir utan að fá 275 milljarða í aðstoð frá hinu opinbera. Þrátt fyrir tal um gegnsæi er ákveðið vantraust ríkjandi og óljós grunur um áhættu í bankakerfinu. Einhvers staðar leynast ókunnar hættur. Nokkir bankar hafa á undanförnum árum ekki tekið kröfuna um 8% eiginfjárhlutfall alvarlega. Fjárframlög frá ríkinu hafa verið talin til eiginfjár. 2019 munu strangari reglur ganga í gildi, þ.e. Basel III.