Vinnuslys á árinu 2012.

Vinnuslys gefa mikilvægar vísbendingar um aðstæður fólks á vinnustað. Á siðasta ári var tilkynnt um 871 karl og 471 konu sem lent höfðu í vinnuslysi. Slysum í mannvirkjageira fækkar og fækkar mun meira en samdrætti í greininni nemur. Í fiskvinnslu er merkjanleg auking vinnuslysa þrátt fyrir að störfum fjölgar ekki. Betri skráning er ein af hugsanlegum skýringum. 87 karlar og 54 konur slösuðust í fiskvinnslu á síðasta ári. 96 karlar slösuðust í málm-og skipasmíði.  Slök umgengni, léleg þrif og frágangur eru mikilvægir orsakavaldar á vinnusvæðum. Margir slasast á vinnuvélum, iðnaðarvélum og handverkfærum. Á vinnusvæðum slasast menn á hálum yfirborði, þökum og stigum. Tognun og útvortis blæðing eru algengustu áverkar. Flestir sem slasast eru ófaglærðir launþegar. ( Ársskýrsla Vinnueftirlitisins 2012.)

Af hverju er erfitt að losna við kennitöluflakk?

Kennitöluflakk er aðferð til að losa sig við skuldir. Skuldir eru skildar eftir í félagi með takmarkaða ábyrgð en eignir fluttar í nýtt félag. Ef allt gengur upp þýðir þetta einskonar afskrift skulda. Allir kröfuhafar tapa. Fyrirtæki, bankar, lífeyrissjóðir, ríkissjóður og launafólk. Iðnaðarráðherra hyggst grípa til aðgerða gegn kennitöluflakki og boðað er nýtt frumvarp um skil ársreikninga. Gott og blessað en þetta hefur allt heyrst áður. Í fréttum Ríkisútvarpsins frá því í desember síðastliðnum segir að á Alþingi liggi fram frumvarp um  breytingar á lögum um ársreikninga. Þá er og verið að vinna að lögum til að verjast kennitöluflakki.  Síðan þá eru liðnir 10 mánuðir. Árið 2005 var kennitöluflakk einnig til umræðu. Þá var gerð könnun sem leiddi í ljós að stjórnendur 600 fyrirtækja töldu kennitöluflakk valda miklum skaða og áætlað tap vegna þess væri 1.5 milljarður. 2004 höfðu Samtök Iðnaðarins farið í herferð gegn kennitöluflakki. Í yfirlýsingum voru þau mjög harðorð í garð fjármálastofnana og töldu að í sumum tilvikum tækju þessar stofnanir þátt í að skipuleggja "vel undirbúið gjaldþrot". Auðljóslega var þar verið að segja að fjármálastofnanir gætu haft hag af kennitöluflakki.  Ef fjármálastarfsemi á að vera á faglegum viðskiptagrundvelli verður að sjálfsögðu að skoða alla viðskiptasögu aðila. Þetta gildir einnig um útboð hjá hinu opinbera. Ef stöðva á kennitöluflakkara verður að koma fram kæra. Eðlilega hefur fjöldi slíkra mála komið á borð sérstaks saksóknara. Í desember síðastliðnum höfðu rúmlega 200 gjaldþrot verið kærð til embættisins. Í árslok 2012 voru skráð 31000 fyrirtæki með takmarkaða ábyrgð. Þá var vitað um 142 einstaklinga sem höfðu verið í forsvari fyrir 5 eða fleiri félög og farið í þrot. Dæmi var um einn mann sem stofnað hafði 17(!) fyrirtæki og skuldaði tugi(!) milljóna í opinber gjöld.

Aðildarviðræður en ekki einhliða aðlögun.

Röksemdir andstæðinga ESB aðildar eru kunnar og sumar þeirra eru hafa verið margendurteknar á undanförnum árum. Ónefndir bloggarar í Heimssýn er þar fremstir í fríðum flokki. Ein röksemdin er sú að engar samningaviðræður séu í gangi en það hljóta að vera nokkur tíðindi fyrir þá sem eru í samninganefndum nú og hafa verið í samninganefndum á undanförnum árum. Við vitum hvað kemur úr samningnum segja bloggarar Heimssýnar; lesið Lissabonsáttmálann og þið hafið samninginn. Lesið á heimasíðu stækkunarsviðs framkvæmdastjórnar ESB en þar stendur að réttarreglur ESB séu ekki umsemjanlegar. Þar segir einnig að aðildarviðræður séu ekki samningaviðræður í venjulegum skilningi. Nú er hægt að spyrja : hver er lagalegur grundvöllur stækkunarstefnu ESB? Hana er að finna í 49. grein sáttmálans um Evrópusambandsins. Í þeirri grein kemur greinilega fram að það er ekkert sem útilokar að hægt sé að semja um réttarreglur sambandsins í aðildarviðræðum. Hægt er að semja um varanlega undanþágu frá tilteknum reglum og einnig um sérlausnir til lengri eða skemmri tíma. Í samningaviðræðum liggur hins vegar fyrir að ESB vill hafa undanþágur sem fæstar. Eins og dæmin sanna hafa ýmis ríki fengið varanlegar undanþágur frá réttarreglum eða samið um varanlegar sérlausnir.( Stuðst við Evrópuvef.)

Norska Stórþingið verður svart af olíu.

Þetta er fyrirsögn á grein í tímariti norsku náttúruverndarsamtakanna Norges Naturvernforbund. Ef koma á í veg fyrir mikla hlýnun jarðar verður að draga verulega úr framleiðslu á olíu , gasi, og kolum. Tvo þriðju hlutar þess sem nú er þekkt má ekki nýta ef ekki á illa að fara.  Umhverfissinar hafa kannað skoðanir forystumanna stjórnmálaflokkanna og ekkert bendir til stefnubreytingar í framleiðslu olíu. Allir flokkarnir vilja nýta nýjar olíulindir. Stærstu flokkarnir, Hægri, Framfaraflokkurinn og Verkamannaflokkurinn vilja allir óbreytta nýtingarstefnu. Hægri og Framfaraflokkurinn vilja boranir eftir olíu í Lófoten. Það eru Græningjar, SV og Rauða framboðið sem vilja ekki leit að olíu og gasi á nýjum svæðum. Þessir flokkar eru umhverfisvænstu hvað varðar stefnu en fylgi er lítið og aðeins SV á þingi nú. Allir flokkarnir vilja hins vegar aðgerðir til að spara orku á heimilum. (naturvernforbundet. no)

Forsætisráðherra á Aljazeera; athugasemdir útlendinga.

Á dögunum var forsætisráðherra í viðtali hjá hinni kunnu fréttastofu Aljazeera. Nú geri ég ráð fyrir að flestir viti nokkurn veginn hvað hann hefur fram að færa enda er það margendurtekið hjá öllum útvarps-og sjónvarpsstöðvum hér á landi. Athyglisvert eru hugmyndir útlendinga um Ísland eins og þær birtast í athugasemdakerfinu. Amb bendir að að hagvöxtur sé á Íslandi, lítið atvinnuleysi og bankar traustir. Allister er þeirrar skoðunar að bankamenn hafi verið settir í fangelsi, skuldir greiddar niður og atvinnulífið hafi náð sér á strik. Hann er einnig þeirrar skoðunar að Ísland hafi hafnað niðurskurði, þjóðnýtt bankana og nú sé hagvöxtur 2.4%. Conlon er þeirrar skoðunar að hagvöxtur hafi aukist eftir að hagöxtur bankamenn voru settir í fangelsi. Parkins vill bera saman Kýpur og Ísland. Á Kýpur hafi hluti af sparifé almennings verið notaður til að leysa vanda bankanna en á Íslandi hafi bankar orðið gjaldþrota, bankastjórar í fangelsi , innistæður verið tryggðar og byrjað að greiða úr skuldavanda einstaklinga. Ad er þeirrar skoðunar að Ísland hafi eingöngu frestað vandamálunum. Mustafa telur að gangi Ísland í ESB verði bankarnir of stórir til að geta fallið. Þetta eru fáein dæmi og eins og sést greinilega er mismikil þekking að baki skoðunum manna. Merkilegt er hversu margir telja að bankamenn á Íslandi séu í fangelsi. Það leiðir hugann að því að al Thanimálið verður nú fljótlega tekið fyrir í dómsölum.

Leiðari Mbl og "vinstri slagsíðan".

Leiðari mbl.is í dag fjallar um Ríkisútvarpið. Þetta mál er ritstjóranum greinilega hugleikið. Þeim mun undarlegra er hversu veik röksemdfærslan er og hversu undarlega röngum tökum málið er tekið. Gleymum því ekki að MBL er rekið og haldið uppi af stórum útgerðarfyrirtækjum sem hafa á undanförnum árum sett mikla fjármuni í að rétta af rekstur blaðsins. Allur fréttaflutningur blaðsins er litaður af eignarhaldi þess.  En hvað kemur fram í leiðarum? Fullyrt er að veruleg gagnrýni og almenn hafi beinst að fréttastofu Ríkisútvarpsins. Þetta er einfaldlega rangt. Gagnrýnin er hvorki veruleg né almenn og það sem verst er hún styðst ekki við áreiðanlega þekkingu á fréttaflutningi Ríkisútvarpsins og fréttaskýringaþáttum. Einstakir þingmenn hafa lengi gagnrýnt Ríkisútvarpið, t.d. GÞÞ og ÓBK. Gagnrýni þeirra var afar þröng og takmörkuð. Þeir fengu á Alþingi upplýsingar um viðmælendur Spegilsins. Samkvæmt talningu voru " óeðlilega" margir vinstrisinnaðir fræðimenn sem talað var við. Þetta byggist á undarlegri rökvillu. Menn gefa sér að það séu jafnmargir vinstri-og hægrisinnar á öllum fræðasviðum eða jafnmargir sérfræðingar á öllum sviðum. Á facebook var stofnaður hópur sem átti að sinna eftirliti með "hlutleysi" ruv. Stofnandi var Frosti Sigurjónsson meðal annarra. Nú er "hlutleysi " fjölmiðla ekki til þannig að væntalega var átt við óhlutdrægni. Nálgun málsins var ákflega þröngsýn og sérkennileg hjá þessum hóp. Flestir voru mjög harðir andstæðingar ESB- aðildar og áhugi þeirra algerlega bundinn við þetta mál. Málflutningur þeirra var nánast allur eins. Ruv hafði birt frétt um esb en einn úr hópnum kom með sínar skoðanir á því hvernig fréttin hefði átt að vera ! Þannig var öll röksemdafærslan. Aldrei var fjallað um rannsóknir fjölmiðlafræðinga á Ríkisútvarpinu og fréttum þess og reglur um fréttaflutning. Hópurinn var og er einhvers konar sjálfsstyrkingar- eða hópeflisfyrirbæri. Í leiðaranum er fjallað um öryggishlutverk Ríkisútvarpsins og nefnd tvö dæmi. Þau eru ekki valin af handahófi heldur í áróðursskyni og til þess að koma höggi á stofnunina. Auðvitað er rétt að fjalla um öryggishlutverkið en ekki með þessum hætti. Kjarni málsins er sá að ríkisútvarp í almannaþjónustu gegnir afar miklu hlutverki í lýðræðislegri umræðu. Einkareknir fjölmiðlar eru beint og óbeint háðir eigendum sínum. Ef einkareknir fjölmiðlar ráða feðinni dregur úr gæðum efnis og meiri áhersla er lögð á afþreygingu og skemmtiefni. Reynslan sýnir að eigendur hafa haft bein afskipti af fréttaflutningi einstakra fréttamanna. Ritstjórnarlegt og faglegt sjálfstæði víkur. Gagnrýni leiðarahöfundar-hver sem hann er- er ekki fagleg eða málefnaleg. Hún er hlutiaf pólitískri herferð sem hefur það að takmarki að koma allri fjölmiðlun í landinu undir einkafjármagnið. Hún er því beinlínis ógn við lýðræðislega umræðu.

 

 

Verkfall á skyndibitastöðum og konur.

Í mörgum borgum USA er starfsfólk skyndibitastaða í verkfalli eins og bloggari hefur áður skrifað um. Aðalkrafan er að hækka lágmarkslaun úr 7.25 dollurum á tímann í 15 dollara á tímann. Verkfall þetta er stærsta verkfall í þjónustugreinum í USA og það er svar við þeirri þróun að hagvöxtur undanfarinna ára skilað sér til stórfyrirtækjanna en ekki í vasa launafólks. Verkfallið sýnir hversu mikilvægar konur eru fyrir verkalýðshreyfinguna og launabaráttuna. 32% allra á vinnumarkaði eru dökkir á hörund en 42% þeirra sem eru á lægstu launum tilheyra þessum hópi. Svartar konur eru meirihluti starfsfólks á skyndibitastöðum. En launin hrökkva ekki til. Meir en 13% starfsfólks fær opinbera aðstoð eða matarmiða. Konur eru tveir þriðju starfsmanna á skyndibitastöðum og fjórðungur starfsfólks á börn. Það eru því skattgreiðendur sem greiða kostnaðinn af miklum hagnaði fyrirtækja eins og McDonalds. Það eru konur sem bera hitann og þungan af kjarabaráttunni.

Grikkland; kreppa í 20 ár?

Gríska vinnumálastofnunin spáir því í nýrri rannsókn að atvinnuleysið verði mjög mikið næstu tvo áratugina. Atvinnuleysið mælist núna 27.6% og fyrst eftir tvo áratugi verður það komið niður fyrir 10%. Kaupmáttur hefur hrunið og er nú eins og hann var fyrir 14 árum. Vegna niðurskurðarstefnu stjórnvalda hafa grískir launþegar tapað sem nemur 41 milljarði evra á síðastliðnum fjórum árum. Á þessu ári er reiknað með samdrætti sem nemur fjórum prósentum. Það væri þá sjötta samdráttarárið í röð. Árið 2014 er gert ráð fyrir vexti um 0.1 til 0.4 %. Fjármálaráðherra Þýskalands telur að í lok árs 2014 verði að veita grikkjum lán sem nemur 4.5 milljörðum evra. Gríski fjármálaráðherrann er bjartsýnn og telur að endurskipulagning ríkisfjármála gangi vel. Á þessu ári séu þjóðartekjur hærri en þjóðarútgjöld. Á öllum sviðum í ríkisrekstrinum er sparað til hins ýtrasta og eingöngu greitt það sem nauðsynlegt er.

Verð á þorskafurðum fer lækkandi í Evrópu.

Á þessu ári hefur framboð aukist um 40% miðað við fisk úr sjó. Samfara þessu hefur verð lækkað verulega eða um 20%. Gífurlega mikil þorskveiði er í Barentshafi og kreppan í Suður Evrópu minnkar eftirspurn. Utflutningur héðan hefur aukist en mest í ferskum flökum. Á þessu ári hefur útflutningur frá Noregi aukist mikið en stærstur hluti hans er saltfiskur. Það sem af er árinu hefur magn útflutnings héðan  aukist um 17% en verð lækkað um 17.3%.  Magnaukning á ferskum flökum er nálægt 91% og fer mest til Bretlands. Verð á flöttum saltfiski er 22% lægra en var í fyrra en hann er fluttur út til Spánar, Frakklands og Bretlands. 25% þorskafurða fara út sem fersk flök og bitar en 34% sem fryst flök og bitar. 29% aflans fer í salt. (kvótinn.is)

Utangarðsfólk í Reykjavík.

Árið 2009 var gerð rannsókn á utangarðsfólki. Þá kom í ljós að stór hluti hópsins átti við áfengis- og vímuefnavanda að glíma. Félagsleg tengsl einstaklinga voru yfirleitt slæm. Um helmingur átti við geðræn veikindi að stríða og 70% voru með líkamlegan sjúkdóm. Meðalaldur var 41 ár og 25% hópsins voru konur. 37% hópsins luku eingöngu grunnskólaprófi og 10 % luku ekki grunnskólanámi. Rúmlega fjórðungur hópsins hafði lokið iðnnámi eða starfstengdu námi. 55% lifðu af örorkubótum og 25% til viðbótar fengu fjárhagsaðstoð frá hinu opinbera. Um helmingur hópsins hafði ekkert samband við upprunafjölskyldu og 15% til viðbótar sögðu sambandið vera lélegt. Samband kvennanna í hópnum við sína upprunafjölskyldu virtist vera betra en karlanna. Helmingur hópsins átti barn eða börn. Tæplega helmingur hafði verið greindur með einn eða fleiri geðsjúkdóm og flestir með kvíða og geðhvarfasýki. 73% höfðu einhvern tíma hugleitt sjálfsvíg og 32% gert tilraun til sjálfsvígs.  85% notuðu áfengi að staðaldri. Sumarið 2009 voru 100 einstaklingar sem töldust heimilislausir eða utangarðs samkvæmt skilgreiningu. 5 voru af erlendum uppruna.  Rúm 60% hópsins höfðu verið heimilislaus í tvö ár eða meira. Í mars síðastliðnum voru heimilislausir 179 samkvæmt úttekt Velferðarsviðs Reykjavíkurborgar.